Ի
ՏԵՐ ՆՆՋԵՑ Տ. ՍԵՊՈՒՀ ԱՐՔԵՊԻՍԿՈՊՈՍ ՉՈՒԼՋՅԱՆԸ
որը
ցավով հայտնում ենք, որ նոյեմբերի 19-ի առավոտյան, կորոնավիրուսի
պատճառով, վախճանվել է Մայր Աթոռ Սուրբ Էջմիածնի միաբաններից Գուգարաց
թեմի Առաջնորդ Տ. Սեպուհ արքեպիսկոպոս Չուլջյանը:
Ն.Ս.Օ.Տ.Տ.
Գարեգին Բ Ամենայն Հայոց Կաթողիկոսը եւ Մայր Աթոռ Ս. Էջմիածնի միաբանությունը
խորապես սգում են լուսահոգի Սեպուհ Սրբազանի անժամանակ մահը: Սրբազան
Հոր վախճանը մեծ կորուստ է Հայաստանյայց Եկեղեցու, Գուգարաց թեմի
եւ նրա հավատավոր զավակների համար:
Յիշատակն արդարոյն օրհնութեամբ եղիցի:
ԿԵՆՍԱԳՐԱԿԱՆ Տ. ՍԵՊՈՒՀ ԱՐՔԵՊԻՍԿՈՊՈՍ ՉՈՒԼՋՅԱՆԻ
Ծնվել է 1959 թ. մարտի 24-ին, Թուրքիայի Մալաթիա քաղաքում: Նախնական
կրթությունն ստացել է Կ. Պոլսի Ներսիսյան վարժարանում: 1969 թ. ընտանիքով
հայրենադարձվել է Հայաստան եւ բնակություն հաստատել Գյումրի քաղաքում,
ուր շարունակել եւ ավարտել է միջնակարգ կրթությունը: 1978 թ. ընդունվել
է Մայր Աթոռ Սուրբ Էջմիածնի Հոգեւոր ճեմարան: 1979 թ. զորակոչվել
է խորհրդային բանակ եւ, զորացրվելուց հետո, ուսումը շարունակել Հոգեւոր
ճեմարանում:
1985 թ. դեկտեմբերին սարկավագ է ձեռնադրվել՝ ձեռամբ Մայր Աթոռի Լուսարարապետ
Տ. Հուսիկ արքեպս. Սանթուրյանի: 1986 թ. մարտին պաշտպանել է ավարտաճառ՝
«Ղուկաս Խարբերդցու թարգմանչական գործունեությունը» թեմայով: Հոգեւոր
ճեմարանն ավարտելուց հետո, Ն.Ս.Օ.Տ.Տ. Վազգեն Ա Ամենայն Հայոց Կաթողիկոսի
օրհնությամբ, ծառայության է անցել Վեհարանում` որպես ընդունարանի
քարտուղար: 1987 թ. հունիսի 7-ին` Հոգեգալստյան տոնին, ձեռամբ Տ.
Ներսես արքեպս. Պոզապալյանի, ձեռնադրվել է կուսակրոն քահանա՝ շարունակելով
ծառայությունը Վեհարանում: 1987 թ. սեպտեմբերին, Վազգեն Ա Վեհափառ
Հայրապետի կարգադրությամբ, նշանակվել է Հոգեւոր ճեմարանի վերակացու
եւ ապա փոխտեսուչ: 1989 թ. նոյեմբերին պաշտպանել է վարդապետական
թեզ՝ «Պահքը Հայաստանյայց Առաքելական Սուրբ Եկեղեցում» թեմայով:
1990 թ. Վազգեն Ա Ամենայն Հայոց Կաթողիկոսի կողմից նշանակվել է Շվեյցարիայի
Ժնեւ քաղաքի հայ համայնքի հոգեւոր հովիվ: 1991 թ. հրավիրվել է Մայր
Աթոռ եւ նշանակվել Շիրակի թեմի փոխառաջնորդ: 1995 թ. հունիսից, Ն.Ս.Օ.Տ.Տ.
Գարեգին Ա Ամենայն Հայոց Կաթողիկոսի օրհնությամբ, հրավիրվել է Մայր
Աթոռ եւ զբաղեցրել Մայր Աթոռի պահեստային տնտեսության գույքագրման
հանձնաժողովի նախագահի եւ տնտեսական ու շինարարական գործերով Կաթողիկոսի
խորհրդականի պաշտոնը: 1996 թ. ընդգրկվել է ՀՀ կառավարության մարդասիրական
օգնության կենտրոնական հանձնաժողովում՝ որպես Մայր Աթոռ Ս. Էջմիածնի
ներկայացուցիչ: 1996 թ. նշանակվել է ՀՀ եւ Հայոց Եկեղեցու հարաբերությունների
խմբում` որպես պետության կողմից Մայր Աթոռին կալվածքների վերադարձման
հանձնախմբի նախագահ:
1996 թ. հունիսի 3-ին, Գարեգին Ա Կաթողիկոսի Հայրապետական սրբատառ
կոնդակով, նշանակվել է Գուգարաց թեմի Առաջնորդ: 1997 թ. հունիսի
15-ին, ձեռամբ Գարեգին Ա Ամենայն Հայոց Կաթողիկոսի, ձեռնադրվել եւ
օծվել է եպիսկոպոս: 2000 թ. մարտի 24-ին Ն.Ս.Օ.Տ.Տ. Գարեգին Բ Ամենայն
Հայոց Կաթողիկոսի կողմից նշանակվել է Հայաստանյայց Առաքելական Սուրբ
Եկեղեցու կանոնադրության հանձնախմբի անդամ: 2000 թ. նոյեմբերին նշանակվել
է Գերագույն հոգեւոր խորհրդի անդամ: 2000 թ. նշանակվել է 1700-ամյակի
տոնակատարությունների գործադիր վարչության անդամ: 2012 թ. մայիսի
17-ին, Գարեգին Բ Հայրապետի սրբատառ կոնդակով, Սեպուհ Սրբազանին
շնորհվել է Արքության պատիվ՝ քահանայագործության 25-ամյակի եւ առաջնորդության
15-ամյակի առիթով: Սրբազան Հայրը հոգեւոր սպասավորության ընթացքում
արժանացել է բազում կոչումների եւ պարգեւների:
>>>
|
|