| ԳԵՐԱԳՈՒՅՆ
ՀՈԳԵՎՈՐ ԽՈՐՀՐԴԻ ԺՈՂՈՎ
ՄԱՅՐ ԱԹՈՌ Ս. ԷՋՄԻԱԾՈՒՄ
 ոյեմբերի
10-ին Մայր Աթոռ Սուրբ Էջմիածնում, նախագահությամբ Ն.Ս.Օ.Տ.Տ. Գարեգին
Երկրորդ Ծայրագույն Պատրիարք եւ Ամենայն Հայոց Կաթողիկոսի, տեղի
ունեցավ Գերագույն հոգեւոր խորհրդի արտահերթ ժողով:
 Ժողովը
բացվեց Ամենայն Հայոց Կաթողիկոսի եւ ԳՀԽ անդամների համատեղ աղոթքով՝
անցնող շաբաթներին Արցախում՝ Թուրքիայի անմիջական մասնակցությամբ,
Ադրբեջանի կողմից սանձազերծված, պատերազմի հետեւանքով զոհված քաջորդիների
հոգիների հանգստության համար:
Ժողովի օրակարգում ընդգրկված էին հարցեր արցախյան հակամարտության
հանգուցալուծման եւ ռազմական գործողությունների դադարեցման կապակցությամբ
ստեղծված իրավիճակի, ինչպես նաեւ Եկեղեցու եւ եկեղեցականության հետագա
անելիքների վերաբերյալ:
Արցախում տիրող կացության վերաբերյալ տեղեկություններ փոխանցեց թեմի
Առաջնորդ Գերաշնորհ Տ. Պարգեւ արքեպիսկոպոս Մարտիրոսյանը:
Առկա պայմաններում Գերագույն հոգեւոր խորհրդի անդամները կարեւորեցին
համազգային միասնության, սթափության եւ զգաստության պահպանումը՝
միեւնույն ժամանակ դատապարտելով զգայունությունների շահարկումները
եւ բռնության դրսեւորումները: Անհրաժեշտ նկատվեց, որպեսզի բոլոր
կողմերը իրադարձությունների գնահատման եւ հետագա զարգացումների առնչությամբ
զերծ մնան քաղաքացիական բախումներ հրահրող, ապակայունացնող հռետորաբանությունից:
Ըստ այդմ՝ ընդգծվեց բարդ իրավիճակի կարգավորման անհրաժեշտությունը
միմիայն քաղաքական գործընթացներով, իրավասու եւ կարող ուժերի համընդհանուր
ջանքերով: Այս առումով շեշտվեց նաեւ Հայոց Եկեղեցու կարեւոր առաքելությունը՝
ի նպաստ ազգային համերաշխության ու փոխըմբռնման մթնոլորտի զորացման:
Քննարկվեցին զինվորականների, վիրավոր զինվորների եւ նահատակ մարտիկների
ընտանիքների հետ եկեղեցականների հովվական աշխատանքի, Արցախի բնակավայրերից
տեղահանված ընտանիքների կարիքների հոգածությանը եւ հոգեւոր խնամքի
կազմակերպմանն առնչվող խնդիրներ:
Վերջում ժողովականները վերստին իրենց աղոթքը բարձրացրին առ Աստված՝
Արցախ աշխարհի եւ համայն հայության անվտանգ ու ապահով կյանքի համար:
ՄԱՅՐ ԱԹՈՌ Ս. ԷՋՄԻԱԾԻՆ ՏԵՂԵԿԱՏՎԱԿԱՆ ՀԱՄԱԿԱՐԳ
>>>
|
|
