ՈՒՍԱՆԵԼԻ
ՈՒԽՏԱԳՆԱՑՈՒԹՅՈՒՆ
ոյեմբերի
7-ին Ս. Հակոբ եկեղեցու մշակութային բաժնի «Երեխաների զբաղվածության
կենտրոն»-ի եւ «Սուրբ Հակոբ» կիրակնօրյայի սաները մասնակցեցին բաց
դաս ուխտագնացության դեպի Հառիճավանք (նախկինում նաեւ՝ Ղփչաղավանք):
Մեկտեղվելով
Ս. Հակոբ եկեղեցու բակում՝ երեխաները, Արտաշես սրկ. Աջապահյանի եւ
ուսուցիչների ուղեկցությամբ, ճանապարհ ընկան: Նրանց վանքում դիմավորեցին
սարկավագներ Արման Հարությունյանը եւ Աշոտ Սարոյանը, ովքեր բարի
գալուստ մաղթեցին փոքրիկ ուխտավորներին: Մինչ երեխաները ճաշում էին,
սարկավագներն անմիջական զրույցի բռնվեցին երեխաների հետ՝ հետաքրքրվելով
նրանց առաջադիմությամբ, դասավանդվող առարկաներով, Ս. Հակոբ եկեղեցում
անցնող առօրյայով: Աշոտ սարկավագը տղաներից հետաքրքրվեց, թե որեւէ
մեկը կցանկանար ուսումը շարունակել Հառիճավանքում գործող Թրբանջյան
հոգեւոր ընծայարանում: Հայկյան Տիգրանը, ով ութ տարեկան է եւ երեք
տարեկանից հաճախում է եկեղեցի մայրիկի ուղեկցությամբ, մասնակցում
Ս. Պատարագներին եւ «Ս. Հակոբ» կիրակնօրյայի սան է, ասաց, որ որոշել
է հոգեւորական դառնալ:
Ճաշելուց հետո, Արման սարկավագի Առաջնորդությամբ, բոլորը եկեղեցում
մասնակցեցին միասնական աղոթքի, այնուհետեւ սարկավագը երեխաներին
ներկայացրեց Հառիճավանքի պատմությունը:
Այն հնագույն միջնադարյան վանքերից է: Ամենահին շինությունը 7-րդ
դարում կառուցված Ս. Գրիգոր եկեղեցին է, որին կից կան, 13- րդ դարում
կառուցված, երկհարկանի աղոթարաններ: Վանքի գլխավոր եկեղեցին կառուցվել
է Զաքարե եւ Իվանե եղբայրների հրամանով՝ 1201 թվականին եւ խաչաձեւ,
գմբեթավոր կառույց է: Հառիճավանքը ժամանակին եղել է նաեւ գիտության
կենտրոն: Այստեղ գործող հայտնի դպրոցում 1887-1889 թթ. սովորել է
Ավետիք Իսահակյանը:
Երեխաներն անչափ ուրախ էին. մեծ մասի համար սա առաջին ուխտագնացությունն
էր: Ուխտավորների ուրախությունը կրկնապատկվեց, երբ Հառիճավանքի տարածքում
տեսան նախօրեին տեղացած ձյունը: Բոլորն սկսեցին ձնագնդի խաղալ եւ
հնամենի տարածքը ողողել մանկական ջինջ ու մաքուր ծիծաղով:
Տ. Վարուժան քհն. Տերտերյանը, Ս. Հակոբի մշակութային բաժնի պատասխանատու
Լուսինե Գրիգորյանը շնորհակալություն են հայտնում Լուսինե Բադալյանին՝
ուխտագնացության ծախսերը հոգալու, սաներին աջակցելու, նրանց օրն
ուրախությամբ լցնելու համար:
ԼՈՒՍԻՆԵ ԳՐԻԳՈՐՅԱՆ
>>>
|
|