ՄԵԾ ՇՈՒՔՈՎ ՆՇՎԵՑ ԳՅՈՒՄՐԻ ՔԱՂԱՔԻ ՕՐԸ
գոստոսի
25-ին Գյումրին հերթական անգամ նշեց «Քաղաքի օր»-ը, որը լի էր անակնկալներով:
«Քաղաքի օր» միջոցառմանը, ինչպես խոստացել էր, ներկա գտնվեց նաեւ
ՀՀ վարչապետ Նիկոլ Փաշինյանը կնոջ` Աննա Հակոբյանի եւ դստրերի հետ:
Ներկաների թվում էին Շիրակի թեմի բարեխնամ Առաջնորդ Տ. Միքայել արքեպս.
Աջապահյանը, մեծանուն բանաստեղծ Հովհաննես Շիրազի որդին եւ դուստրը,
թոռները, տոնի առիթով Գյումրի ժամանած մեծաթիվ հյուրեր:
Ի
դեպ, քաղաքապետը շնորհակալություն հայտնեց ՀՀ վարչապետին՝ օրեր առաջ
Գյումրին այդպես հրաշալի ներկայացնելու համար:
«Վարպետների քաղաք» խորագիրը կրող միջոցառման շրջանակներում՝ ժամը
11:00-ից սկսած, քաղաքի տարբեր հատվածներում բացօթյա տարաբնույթ
միջոցառումներ անցկացվեցին՝ տոնական համերգներ, ցուցադրություններ,
տիկնիկային ներկայացում:
«Քաղաքի օրվա» ամենասպասված միջոցառումը «կարմիր» կամ Շիրազի փողոցի
բացումն էր: Խորհրդանշական կարմիր ժապավենը կտրելու պատիվը վերապահվեց
մեծանուն բանաստեղծի թոռներին:
Փողոցի հիմնանորոգման աշխատանքներն իրականացրել է «Մերձմոսկովյան»
ԲԲ ընկերությունը՝ Համաշխարհային բանկի ֆինանսավորմամբ: 700 մետր
երկարություն ունեցող փողոցում իրականացվել են երթեւեկելի մասի եւ
մայթերի հիմնանորոգման աշխատանքներ: Տեղադրվել է ասֆալտի ծածկույթի
երկու շերտ՝ 6 սմ հաստության ներքին շերտ եւ 4 սմ հաստության վերին
շերտ: Անձրեւաջրատար կոյուղացանցի մի մասը նոր է կառուցվել, իսկ
մյուս մասը վերականգնվել է: Հոսանքալարերը վերգետնյայից տեղափոխվել
են ստորգետնյա, հին հենասյուները փոխարինվել են նորերով:
Նորոգման աշխատանքները մեկնարկել էին դեռ նախորդ վարչապետ Կարեն
Կարապետյանի՝ «Կումայրի» արգելոցը տուրիզմի կենտրոնի վերածելու ծրագրով:
Նախնական որոշմամբ փողոցը սալիկապատվելու էր այնպես, ինչպես «Ռուսթավելի»-ն,
ավելի ուշ, ֆինանսական միջոցների սղության պատճառով, որոշվեց այն
ասֆալտապատել:
Նորաբաց Շիրազի փողոցում գյումրեցի վարպետները ներկայացան իրենց
արհեստներով ու արվեստով: Տոնական օրը յուրովի նշեցին նաեւ քաղաքի
թանգարանները, իսկ ժամը 17.00-23.00 տեղի ունեցավ տոնական համերգ՝
գյումրեցի ու հրավիրված երգիչ-երգչուհիների կատարմամբ:
Ելույթ
ունեցան նաեւ հայտնի երգչուհիներ Նունե Եսայանն ու Իվետա Մուկուչյանը:
Հաշվի առնելով Նունե Եսայանի անվան շուրջ հնչող մեղադրանքները, թե
նա մեկ միլիոն դրամ է պահանջել ելույթ ունենալու համար` քաղաքապետը
լրագրողներին ասաց. «Եսայանն ինքն է ցանկություն հայտնել ելույթ
ունենալ Գյումրիում, եւ այդ մասին ինձ տեղեկացրել է մեր մշակույթի
բաժինը: Ի դեպ, այդ ելույթի ողջ հասույթը Նունե Եսայանը նվիրելու
է քաղաքի թիվ 1 երաժշտական դպրոցին՝ երաժշտական գործիքներ գնելու
համար»:
Քաղաքապետ Սամվել Բալասանյանի նախաձեռնությամբ մայրաքաղաքից միջոցառմանը
մասնակցել ցանկացողների համար լուծվել էր տեղափոխման խնդիրը: «Հարավկովկասյան
երկաթուղիներ»-ի հետ պայմանավորվածության համաձայն՝ օգոստոսի 25-ին
երկու գնացք էր գիծ դուրս եկել՝ առաջինը ժամը 11:00-ին, երկրորդը՝
մեկ ժամ անց, իսկ երեկոյան վերադարձը 23:30-ին էր, որպեսզի ցանկություն
ունեցողները կարողանային տեսնել հրավառությունը:
Գյումրու տոնին մասնակցելու էր եկել նաեւ Ռուսաստանի Դաշնության
Նովոչերկասկ քաղաքի քաղաքապետ Իգոր Զյուզինը: Նրա եւ Գյումրու քաղաքապետ
Սամվել Բալասանյանի միջեւ կնքվեց համաձայնագիր, համաձայն որի երկու
քաղաքները հռչակվեցին քույր քաղաքներ: Նշենք, որ Նովոչերկասկը Ռոստովի
մարզում է, այն գտնվում է Դոնի Ռոստովից 25 կիլոմետր հեռավորության
վրա, համարվում է Դոնի կազակության մայրաքաղաքը:
ԳՅՈՒՄՐՈՒ ՔԱՂԱՔԱՊԵՏԱՐԱՆ
>>>
|
|