| ԵՎ
ԱՂՈԹՔՆ ԷՐ ՆՐԱՆՑ ՈՒՂԵԿԻՑԸ
«Տէ՛ր, ուղղեա զգնացս մեր ի ճանապարհս
խաղաղութեան.
Տէ՛ր, ուղղեա եւ առաջնորդեա հոգւոց եւ ամենայն հաւատացելոց…»:
ՇԱՐԱԿՆՈՑ
 խտագնացությունները
հայ քրիստոնյայի անհատական կյանքի հոգեւոր դաստիարակության լավագույն
միջոցներից են եւ կապված են ոչ միայ Հիսուս Քրիստոսի կյանքին առնչվող
վայրերի, այլեւ մարտիրոսների, սրբերի գերեզմանների, հրաշագործությունների
հետ:
Հունիսի 8-ի վաղ առավոտյան, Ռիմա Բարինյանի, Զարիկ Իգիթյանի եւ Ժաննա
Խաչատրյանի նախաձեռնությամբ, մի խումբ ուխտավորներ արեւածագը դիմավորեցին
Ս. Յոթվերք եկեղեցու հյուրընկալ բակում՝ մեկնելու ուխտագնացության
Գյումրի - Գորիս – Վայոց ձոր երթուղով:
ՄՈՇԱՂԲՅՈՒՐԻ Ս. ՀՈՎՀԱՆՆԵՍ ԿԱՐԱՊԵՏ ԵՎ
ՄԱԼԻՇԿԱՅԻ Ս. ԱՆՆԱ ԱՂՈԹԱՏՆԵՐԸ
 Ուխտավորների
առաջին հանգրվանը Արկազի Ս. Հովհաննես Կարապետ եկեղեցին էր: Այն
եղել է վանական համալիր եւ գտնվել է Մոշաղբյուր (նախկինում՝ Զինջիրլու)
բնակավայրում: Հայաստանի հնագույն եւ նշանավոր բնակավայրերից մեկն
է: Ս. Հովհաննես Կարապետ վանքի վիմագիր արձանագրությունում նշվում
է, որ 1301 թ. իշխանուհի Գոնցան կառուցել է «Սպիտակավոր Աստվածածին՝
Ս. Հակոբ-Կարապետ վանական համալիրը»: Վերջինս Ջալալ Օրբելյանի կինն
էր:
Գմբեթավոր, սրբատաշ քարերով կառույց է: Եկեղեցու ներսում է գտնվում
Օրբելյանների զինանշան քանդակը: Համալիրը կանգուն է մնացել մինչեւ
1678 թ. երկրաշարժը: Եղել է նաեւ գրչության կենտրոն:
Հիրավի եկեղեցին Աստծո տունն է, պաշտամունքի սրբազան վայր, ուր հանդիպում
են երկինքն ու երկիրը, ժամանակավորն ու հավիտենականը: Այստեղ ուխտավորները
գոհաբանական աղոթք բարձրացրին առ Աստված՝ հայցելով Ամենակարող Տիրոջ
բարեգթությունը:
Այնուհետեւ ուխտագնացների խումբն առաջնորդվեց Մալիշկայի Ս. Աննա
եկեղեցի, որ 2000 թ. կառույց է: Այստեղ նրանք իրենց աղոթքն առաքեցին
առ Բարձրյալը, ապա հնչեցրին հոգեւոր երգեր, շարականներ:
ՍՈՒՐԲ ԽԱՉ ԵԿԵՂԵՑԻՆ
Հաջորդ ուխտավայրը Ս. Խաչ եկեղեցին էր: Գտնվում է Վայոց ձորի Վերնաշեն
գյուղից յոթը կիլոմետր դեպի արեւելք: Այն Վայոց ձորի նշանավոր ուխտատեղին
է եւ հիշատակվում է 8-րդ դարից: Ս. Խաչը հատկանշական է նրանով, որ,
շնորհիվ Բյուրեղ իշխանուհու, հարավարեւելյան ավանդատանն ամփոփված
է Հիսուս Քրիստոսի խաչելության փայտի մասունքը: Այդ պատճառով էլ
վանքը կոչվում է Սուրբ Խաչ: Եկեղեցու զարմանահրաշ ազդեցությունը
շատերն են զգացել:
1857-ին խոնարհվել է: Այն հիմքից վերստին կառուցել է Գեւորգ Դ Կոստանդնուպոլսեցին:
Ուխտավորները երկյուղով համբուրեցին խնկաբույր քարերը, վառեցին իրենց
հավատքի մոմերը:
ՄԱՍԻՍԻ ՍՈՒՐԲ ԹԱԴԵՈՍ ԵԿԵՂԵՑԻՆ
Վերջին հանգրվանը Մասիս քաղաքի Ս. Թադեոս եկեղեցին էր, որ կառուցվել
է 2015 թվականին՝ Միքայել եւ Կարեն Վարդանյանների նախաձեռնությամբ:
Ուխտավորները ծնրադիր, միաձայն ու միահունչ երգեցին «Տեր ողորմյա»-ն,
«Հայր մեր»-ը, «Սուրբ Աստված»-ը եւ աղոթք վերառաքեցին ի փառս Աստծո:
Յուրաքանչյուր քրիստոնյա հավերժի ճամփորդ է, ու այդ ճամփորդության
այս մի փոքրիկ հանգրվանը, որ այսօր կատարեցինք, թող պսակվի աստվածային
օրհնությամբ: Անգամ տեղացող հորդ անձրեւը չկարողացավ խանգարել ուխտավորներին,
քանզի աղոթքով էին նրանք ճանապարհ ընկել եւ աղոթքով էլ վերադառնում
էին՝ սրբավայրերի զորությամբ լցված:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ՄԱՐԻԵՏԱ ՇՈՂՈՅԱՆԻ
>>>
|
|
