ԵՂԻՐ
ԵՎ ՄՆԱ ՀԱՎԱՏԱՐԻՄ ԱՍՏԾՈՒՆ, ՈԽՏԻ ԺՈՂՈՎՈՒՐԴ
ուրաքանչյուր
հայ քրիստոնյա քաջ գիտակցում է, որ իր կյանքը չի սահմանափակվում
այս աշխարհով, եւ գիտի, որ իր ճամփան եկեղեցու միջոցով է ընթանում
դեպի երկնային Երուսաղեմ: Մարդ արարածը երկնային թագավորությանը
հասնելու ճանապարհին մի ուխտավոր է, եւ իր ուխտագնացությունը պահում
է իրեն հավիտենական երդման, դաշինքի, Ամենաբարձրյալին հասնելու առաջընթացի
մեջ:
Մայիսի
30-ին՝ Համբարձման տոնի ուրախ առիթով, Ս. Յոթվերք եկեղեցու մի խումբ
ուխտավորներ, նախաձեռնությամբ Ռիմա Բարինյանի, Ժաննա Խաչատրյանի
եւ Զարիկ Իգիթյանի, այցելեցին Գեղարդավանք:
Առաջին ուխտատեղին, ուր եղան ուխտավորները եւ ներկա գտնվեցին մատուցվող
Սուրբ Պատարագին, Կոտայքի մարզի Գեղարդավանքն էր: Այն գտնվում է
Գառնի գյուղից հյուսիս-արեւելք, Ազատան գետի Գողթ վտակի ձորալանջին:
Հիմնել է մեր հավատո հայրը՝ Ս. Գրիգոր Լուսավորիչը, IV դարասկզբին:
Գեղարդավանքը հայոց վանական համալիրների շարքում բացառիկ տեղ է գրավում
ճարտարապետական լուծումների շնորհիվ: Կոչվում է նաեւ Այրիվանք, քանզի
վիմափոր խցերից մեկում է ապրել 13-րդ դարի անվանի պատմաբան Մխիթար
Այրիվանցին, իսկ Գեղարդ անվանումն է ստացել, որովհետեւ այստեղ է
պահվել Տիրամուխ Գեղարդը: Գլխավոր կաթողիկեն կառուցվել է 1215 թ.,
երբ Գեղարդը պատկանում էր Զաքարյանների տոհմին: Պռոշ իշխանն այստեղ
է կառուցել նաեւ իր որդի Պապիկի ու կնոջ՝ Ռուզաքանի դամբարանը:
Այրիվանքում օրվա պատարագիչն էր վանահայր Տ. Կյուրեղ վրդ. Դավիդյանը:
Սրբազան արարողակարգի ընթացքում՝ «Հայր մեր»-ից առաջ, օրվա խորհրդին
համահունչ քարոզ խոսեց պատարագիչ Հայր Սուրբը:
Հաջորդ հանգրվանը 19-րդ դարի Ս. Պողոս եւ Ս. Պետրոս եկեղեցին էր:
Այստեղ ուխտավորները երգեցին շարականներ, վառեցին մոմեր:
Երրորդ ուխտատեղին Նոր Գյուղի Ս. Աստվածածիններ էր: Վերջին հանգրվանը
Աբովյանի Ս. Հովհաննես նորակառույց եկեղեցին էր: Այստեղ եւս բոլորը
համատեղ աղոթեցին՝ Բարձրյալից հայցելով զորավիգ լինել հայոց հինավուրց
աշխարհին եւ Եկեղեցուն, իսկ երեկոյան, գոհ սրտով, սաղմոսասացությամբ
եւ մեծախորհուրդ շարականների երգեցողությամբ, բռնեցին տունդարձի
ճամփան:
Հիրավի յուրաքանչյուր ուխտագնացություն հավատքի վերահաստատում է
ու մի նոր օրհնություն ուխտավորի կյանքի ճանապարհին:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐԸ՝ ՄԱՐԻԱՄ ՔԱՂՑՐԻԿՅԱՆԻ
>>>
|
|