«ԴԱՍՔ
ԱՆՄԱՐՄՆՈՑ ՀՐԵՇՏԱԿԱՑ ՔԵԶ ԵՐԱՆԵՆ,
ԱՄԵՆՕՐՀՆԵԱԼ ԿՈՅՍ ՄԱՐԻԱՄ …»
ԱՎԵՏՈՒՄՆ ՍՈՒՐԲ ԱՍՏՎԱԾԱԾՆԻ
«Ի չորրորդ օր դարձեալ հրեշտակն ետ զաւետիսն
կուսական, թէ լոյսն որ ոչ բովանդակի ի քէն մարմնով պարունակի»:
ՇԱՐԱԿՆՈՑ
այ
Առաքելական Ս. Եկեղեցին հնուց ի վեր տոնախմբել է Ս. Ավետման սքանչելի
եւ մեծախորհուրդ տոնը, որ հաստատուն եւ անշարժորեն նշվում է ապրիլի
7-ին՝ ի հիշատակ Գաբրիել հրեշտակապետի Կույս Մարիամին բերած այն
ավետիսի, թե, Սուրբ Հոգու զորությամբ, Աստծո Որդին իրենով պիտի մարդեղանա:
Եվ երկրի վրա ծնված կանանցից այն միակը, ում, Նարեկյան բնութագրմամբ,
«ծոցն լուսափայլ» էր, «խնկեալ ի կնդրկէ բուրվառ հրով աստուածայնով
լցեալ», դարձավ մայրն Աստվածորդու: Ինչպես Որդուն, այնպես էլ մորը
պետք է հասցեագրել «եւ արատ ինչ ոչ գոյ ի Քեզ» երգ-երգոցյան տողը:
Եվ ահա 2000 տարի է արդեն, ինչ քրիստոնյան, Տիրոջից հետո, իր աղոթքն
առավելապես ուղղում է Տիրամորը՝ որպես մայրական սիրո ու նվիրվածության,
ողորմասիրության ու կարեկցանքի, խոհեմության, հեզության ու համբերության,
հավատարմության ու զոհաբերումի խորհրդանիշի, որպես բարեխոսի, մարդկային
մեղսական ցեղից ծնված կուսականության: Քրիստոնյան ծնկել է ու աղոթել,
վստահել ու հավատացել, խաղաղվել ու մաքրագործվել է՝ «բարեխօս ունիմք
սուրբ զՄարիամ զԱստվածածինն՝ զփառաւորեալ ու օրհնեալ միշտ սուրբ
Կոյսն…» խոսքերը շուրթերին:
Պատահական չէր, որ Հովհաննես Մկրտչի մայրը՝ Եղիսաբեթը, երբ հանդիպեց
Մարիամին Սուրբ Հոգով հղիանալուց հետո, «լցվեց Սուրբ Հոգով եւ բարձր
ձայնով աղաղակեց. «Օրհնեալ ես դու կանանց մեջ, եւ օրհնեալ է քո որովայնի
պտուղը» (ՂԿ. Ա. 42): Անշուշտ, Մարիամն արժանի է իրեն ընծայված բոլոր
պատիվներին, հատկապես այն գերագույն պատվին, որ մեր բոլոր եկեղեցիների
Սուրբ Սեղանները պսակված են Ս. Կույսի մայրական նկարով՝ մանուկ Լույս
Հիսուսը գրկում: Մոր եւ Մանկան այդ հոգեթով պատկերը չի կարող անտարբեր
թողնել որեւէ մեկին: Ուստի, կարելի է ասել, որ նրա Մանուկը նաեւ
մեկ այլ իմաստ է խորհրդանշում, այսինքն՝ ողջ մարդկությունը, որին,
Սուրբ Աստվածածինն իր գիրկն առած, խնամում է սիրող մոր պես, քանզի
նա, ողջ տիեզերքն ստեղծող, Աստծո մայրն է: Արդ, աղաչենք մայրերի
մորը, որ իր գրկում մշտապես կրում է աշխարհի Փրկչին՝ հիշեցնելով
նրան Խաչի մոտ թափած արցունքները՝ որպես բարեխոսություն բազմամեղներից
համար:
ԱՎԵՏՄԱՆ ՍՈՒՐԲ ՊԱՏԱՐԱԳ
Ապրիլի 7-ին վերստին հնարավորություն ընձեռվեց մեզ՝ ազգովի ծնրադրել
Տիրամոր առջեւ եւ աղոթել վասն աշխարհի խաղաղության, Հայ Առաքելական
Սուրբ Եկեղեցու անսասանության, արդարության եւ գթասրտության, նաեւ
մեր հոգու փրկության: Առաջնորդանիստ Ս. Աստվածածին մայր եկեղեցում,
գիշերային եւ առավոտյան ժամերգություններից հետո, տոնի ուրախ առիթով,
մատուցվեց Սուրբ եւ անմահ Պատարագ: Օրվա պատարագիչն էր Տ. Շիրակ
ավագ քհն. Առաքելյանը: Հընթացս սրբազան արարողության՝ «Հայր մեր»-ից
առաջ, օրվա խորհուրդը մեկնող քարոզ խոսեց Տ. Ավետիք աբղ. Սողոմոնյանը:
Սուրբ Պատարագի ընթացքում ներկա գտնվողները, ինչպես նաեւ Երեւանի
Կոնդի Ս. Հովհաննես եկեղեցու ուխտավորներն ստացան Ս. Հաղորդություն:
Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսի
բարձր տնօրինությամբ տարիներ առաջ Սուրբ Աստվածածնի Ավետման տոնը
հռչակվել է մայրության օրհնության օր: Այդ օրը Հայոց Եկեղեցու բոլոր
տաճարներում, ինչպես նաեւ Ս. Աստվածածին եկեղեցում, Սուրբ Պատարագից
հետո, կատարվեց մայրության բերկրանքին սպասող կանանց օրհնության
հատուկ կարգ:
ԱԼՎԱՐԴ ԿԱՂԶՎԱՆՑՅԱՆ
>>>
|
|