ՍՈՒՐԲ
ԾՆՈՒՆԴՆ ՈՒ ԱՍՏՎԱԾԱՀԱՅՏՆՈՒԹՅՈՒՆԸ
ՍՈՒՐԲ ՀԱԿՈԲ ԵԿԵՂԵՑՈՒՄ
ուրբ
Ծննդյան եւ Աստվածահայտնության տոնակատարությունը, ինչպես Հայաստանյայց
Առաքելական բոլոր եկեղեցիներում, այնպես էլ Գյումրու Սուրբ Հակոբում
սկսվեց հունվարի 5-ի երեկոյան մատուցված Ճրագալույցի Սուրբ եւ անմահ
Պատարագով, քանի որ Քրիստոսի Ծնունդը կեսգիշերին եղավ:
«Ճրագալույց»
նշանակում է ճրագ կամ մոմ լուցանել (վառել), իսկ վառված ճրագը խորհրդանշում
է Բեթղեհեմյան Աստղը, որ առաջնորդեց մոգերին դեպի այն քարայրը, ուր
խանձարուրի մեջ փաթաթված Մանուկն էր:
Օրվա պատարագիչն ու քարոզխոսն էր Տ. Ռուբեն քհն. Գասպարյանը: Սրբազան
արարողակարգի ընթացքում՝ «Հայր մեր»-ից առաջ, պատարագիչ Տեր Հայրը,
դիմելով ներկա հավատացյալներին, հանգամանալից մեկնեց օրվա խորհուրդը
եւ փոխանցեց Սուրբ Ծննդյան ավետիսը:
ՍՈՒՐԲ ԾՆՆԴՅԱՆ ՊԱՏԱՐԱԳ ԵՎ ՋՐՕՐՀՆԵՔ
Հունվարի 6-ին նույնպես մարդաշատ էր Սուրբ Հակոբ եկեղեցին, ովքեր
եկել էին ներկա գտնվելու մեր Տեր եւ Փրկիչ Հիսուս Քրիստոսի Սուրբ
Ծննդյան եւ Աստվածահայտնության Սուրբ Պատարագին, որը մատուցվեց ձեռամբ
Տ. Ռուբեն քհն. Գասպարյանի: Սրբազան արարողակարգի ընթացքում ընթերցվեց
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի Սուրբ Ծննդյան պատգամը:
Սուրբ
Ծննդյան Պատարագից հետո, ձեռամբ Տ. Վարուժան քհն. Տերտերյանի, կատարվեց
Ջրօհրնեքի ավանդական արարողակարգը, որը խորհրդանշում է Հորդանան
գետում Հիսուս Քրիստոսի մկրտությունը՝ ձեռամբ Հովհաննես Մկրտչի:
Հատուկ աղոթքներով եւ շարականների երգեցողությամբ ջուրն օրհնվեց
Ավետարանով, Սուրբ Խաչով եւ սրբագործվեց սրբալույս Մյուռոնով:
Այնուհետեւ օրհնված ջուրը բաժանվեց ներկա հավատացյալ ժողովրդին:
Այս տարի Սուրբ Խաչի կնքահոր պատվին արժանացավ Վաղինակ Դավթյանը:
Հունվարի 7-ին Սուրբ Հակոբ եկեղեցում մատուցվեց մեռելոցի Սուրբ Պատարագ,
հընթացս որի կատարվեց հոգեհանգիստ «վասն համորէն ննջեցելոց»: Օրվա
պատարագիչն էր Տ. Վարուժան քհն. Տերտերյանը:
ԼՈՒՍԻՆԵ ԳՐԻԳՈՐՅԱՆ
ԼՈՒՍԱՆԿԱՐՆԵՐԸ՝ 6-K ՍՈՒԴԻԱՅԻ
>>>
|
|