| ԻՆՉՈՒ
ԿՐԿԻՆ ՀԵՏԱՁԳՎԵՑ ԵՐԿՐԱՇԱՐԺԻՑ
ԽՈՆԱՐՀՎԱԾ Ս. ԱՄԵՆԱՓՐԿԻՉ ԵԿԵՂԵՑՈՒ ԲԱՑՈՒՄԸ
ՊԱՐԶԱԲԱՆՈՒՄ Է ԹԵՄԱԿԱԼ ԱՌԱՋՆՈՐԴ Տ. ՄԻՔԱՅԵԼ ԵՊԻՍԿՈՊՈՍ
ԱՋԱՊԱՀՅԱՆԸ
 եռեւս
օգոստոս ամսին ամփոփելով իր պաշտոնավարման 100 օրը՝ ՀՀ մշակույթի
նախարար Լիլիթ Մակունցը, լրագրողների հետ հանդիպման ժամանակ, տեղեկացրել
էր, որ նախատեսված է, երկրաշարժի 30-րդ տարելիցին ընդառաջ, 30 մլն.
դրամ հատկացնել Գյումրու Ս. Ամենափրկիչ եկեղեցու վերջնական նորոգումն
իրականացնելու եւ դեկտեմբերի 7-ին այն բացելու համար:
 Սակայն
նախարարի պաշտոնակատարին ուղղված այն հարցին, թե արդյո՞ք եկեղեցու
հիմնանորոգումն ավարտին է հասցվել, եւ այն դռները կբացի հավատացյալների
առջեւ, վերջինս պատասխանել էր. «Մշակույթի նախարարության մեծ ջանքերի
շնորհիվ հաջողվեց խնայողություններն ուղղել Սուրբ Ամենափրկիչ եկեղեցու
վերանորոգման աշխատանքների այն հատվածին, որը կարող էինք ստանձնել:
Բայց, ցավոք, որոշակի խնդիրներ առաջացան հենց այնտեղ. գումարը չծախսվեց
ու վերադարձվեց պետական բյուջե: Ասպես ասած՝ խնայողություններ եղան,
հատկացումները կատարվեցին, բայց չօգտագործվեցին»: Մշակույթի նախարարի
ժամանակավոր պաշտոնակատարն իր պարզաբանմանը նաեւ հավելել էր, որ
այս թեմայի շուրջ ավելին ասել չի ցանկանա:
Նմանատիպ հարց ուղղվեց նաեւ Հայ Առաքելական Եկեղեցու Շիրակի թեմի
Առաջնորդ Տ. Միքայել եպիսկոպոս Աջապահյանին, ով, անդրադառնալով եկեղեցու
վերաբացմանը, նկատեց, թե այն բարի ցանկություն էր, որ չիրականացավ,
չհասցրեցին:
«Դեռեւս նախկին իշխանությունների հետ պայմանավորվածություն կար:
Նրանք պետք է ամեն ինչ անեին, որ այսօր՝ այդ արհավիրքի 30-րդ տարելիցին,
Սուրբ Ամենափրկիչը պատրաստ լիներ: Բայց իշխանափոխություն եղավ, մինչեւ
ամեն ինչ հունի մեջ ընկավ, ձգձգվեց ու գործնականում հնարավոր չեղավ
ավարտին հասցնել», - նշեց թեմակալ Առաջնորդը:
Տեւական ժամանակ է՝ եկեղեցու վերականգնումը գրեթե ավարտական փուլում
է, սակայն, չգիտես թե ինչ պատճառով, բարերարն այն ավարտին չի հասցնում:
Միքայել Սրբազանը տեղեկացրեց, որ եկեղեցին ամբողջությամբ վերականգնված,
վերակառուցված է, ուղղակի վերաբացման համար ներքին հարդարումը պետք
է ավարտվի: Դիտարկմանը, թե ինչո՞ւ ներքին հարդարման համար չեն օգտագործել
նախարարության հատկացրած գումարը եւ ինչո՞ւ է այն վերադարձվել պետբյուջե,
պատասխանեց. «Չի օգտագործվել, որովհետեւ հնարավոր չէր այդ կարճ ժամանակամիջոցում
անել այն, ինչ պետք էր: Ու եթե չես օգտագործում, գումարը վերադառնում
է պետբյուջե: Եվ հետո նախարարության կողմից հատկացված գումարը բավարար
չէր վերաբացման համար, որոշ հավելյալ ծախսեր կային, որը ոչ ոք հանձն
չառավ իրականացնել»:
Սրբազան Հայրը հրաժարվեց այլեւս ժամկետներ նշել. թե երբ երկրաշարժ
ապրած եկեղեցին կվերաբացվի, պարզ չէ:
«Արդեն ոչ մի տեղ չունենք շտապելու: Անցած տարի ես նախագահին (Սերժ
Սարգսյանին՝ հեղ.) ասացի, նա էլ խոստացել էր, որ ամեն ինչ կարվի,
եւ 2018-ին՝ 30-րդ տարելիցով, Ս. Ամենափրկչի հարցը կփակվի: Եթե հիմա
չեղավ, ապա սրանից հետո մեկ, թե երկու տարի կտեւեն աշխատանքները,
միեւնույն է, դա ոչինչ չի փոխում»,- իր խոսքը եզրափակեց բարեխնամ
Առաջնորդ Սրբազանը:
ՆԵԼԼԻ ՄԱՐԳԱՐՅԱՆ
>>>
|
|
