«ՊԱՏԱՐԱԳ
ԱՍՏՈՒԾՈՅ ՀՈԳԻ ԽՈՆԱՐՀ»
ԱՍՏՎԱԾԱՍԻՐՈՒԹՅԱՆ, ԱՍՏՎԱԾՃԱՆԱՉՈՒԹՅԱՆ
ԵՎ ՀԱՅՐԵՆԱՍԻՐՈՒԹՅԱՆ ՍԱՀՄԱՆԸ
Սկիզբը` նախորդ համարներում
ավոք
մեր իրականության մեջ հայրենասիրությունը հաճախ նույնանում է անթաքույց
եւ անամոթ եսասիրության հետ: Անձնական հարստությունը փորձ է արվում
ներկայացնել իբրեւ հայրենիքի հարստություն, սակայն նվազագույն իսկ
հնարավորության դեպքում այն տեղափոխվում է արտասահման: Այնտեղ է
տեղափոխվում նաեւ հայրենիքի համար թանկագինը` նոր սերունդը: Հնարավորություն
ունեցողների մեջ արդեն ամենատարածված երեւույթը դարձել է իրենց զավակներին
Ամերիկայի Միացյալ Նահանգներում լույս աշխարհ բերելը: «Հայրենիք»
են երգում, սակայն իրենց զավակներին անձեռնմխելի են դարձնում հայրենիքի
նկատմամբ պարտավորություններից, որպեսզի նրանք մեծանան կոսմոպոլիտ
հայացքներով եւ անհրաժեշտության դեպքում լքեն հայրենիքը` հայրենիքի
նկատմամբ միմիայն պահանջատիրական Ու իրավատիրական նկրտումներ ունենալով:
Եթե ազգն սկսում է «ավետյաց երկիր» համարել մեկ այլ երկիր, քան իր
հայրենիքն է, դա կոլեկտիվ դեգրադացիայի եւ ինքնասպանության ամենախորացված
փուլն է, ինչից կարելի է դուրս գալ միմիայն հերոսական ճիգերի եւ
ինքնազոհության շնորհիվ: Ազգի ապագան չի կարելի կապել որեւէ մեկ
այլ բանի հետ, եթե ոչ միմիայն հայրենիքի` հոգեւոր եւ նյութական.
սա պետք է հասկանալ եւ միմիայն այս ուղղությամբ գործել: Ինչպե՞ս
կարելի է թույլ տալ, որ ուրիշի երկիրը բռնազավթած օտարը նույն այդ
բռնազավթած տարածքն իր համար «վաթան» համարի, մինչ սեփականատերը
խորթություն ապրի այդ նույն տարածքի հանդեպ:
Այստեղ անհրաժեշտաբար արդեն պետք է անդրադառնանք հայրենասիրության
եւ ազգասիրության փոխկապակցվածությանն ու փոխլրացմանը: Չկա հայրենասիրություն՝
առանց ազգասիրության, եւ ազգասիրությունն անիմաստ է առանց հայրենասիրության:
Ազգասիրությունը հայրենասիրության անհրաժեշտ բաղկացուցիչն է. հայրենասիրությունն
էլ ազգասիրության մեջ ներթափանցված է: Այս երկուսի տարանջատումը
կարող է աղաղակել այն մասին, որ ճշմարտության փոխարեն կեղծիք է առաջարկվում:
Եթե որեւէ մեկի մոտ այս երկուսն անբաժան եւ անբաժանելի չեն, ուրեմն
կեղծ դրամ է ձեր առջեւ, ուրեմն պետք է զգուշանալ:
Շարունակելի
>>>
|
|