ՈՒԽՏԸ
ՄԱՐԴՈՒՆ ԲԱՐՁՐԱՑՆՈՒՄ Է ԴԵՊԻ ԱՍՏՎԱԾ
այիսի
28-ին Հայաստանյայց Եկեղեցին տոնեց Ս. Հռիփսիմյանց կույսերի հիշատակը:
Տոնի առիթով Ս. Յոթվերքի մի խումբ ուխտավոր հավատացյալներ, Ռիմա
Բարինյանի եւ Զարիկ Իգիթյանի նախաձեռնությամբ, այցելեցին Վաղարշապատի
Ս. Հռիփսիմե վանք՝ ներկա գտնվելու մատուցվելիք Սուրբ եւ անմահ Պատարագին:
Վանքը կառուցվել է Ս. Հռիփսիմեի նահատակության տեղում, ուր եւ ամփոփվել
է նրա աճյունը: Ագաթանգեղոսի վկայությամբ՝ կույսի նահատակության
տեղում Ս. Գրիգոր Լուսավորիչը եւ Տրդատ արքան կառուցել են վկայարան,
որը կիսագետնափոր էր՝ վերնամասում քարաշեն չորս սյուներով ամպհովանի:
395 թ. Ս. Սահակ Պարթեւը, կույսի գերեզմանի վրա կառուցել է տալիս
մի փոքր մատուռ:
Հայ ճարտարապետության ոսկեդարի սկզբներին, կաթողիկոսական տնօրինությամբ,
նախկին մատուռի տեղում վեր հառնեց նոր ու փառավոր մի կառույց, որի
գեղեցկությամբ հիանալու բախտն ունի նաեւ այս սերունդը: Հովհաննես
Դրասխանակերտցին գրում է, որ եկեղեցու շինության ժամանակ բացվել
է Սուրբ կույսի մասունքներով տուփը, որ եղել է անձեռնմխելի եւ ունեցել
երեք կնիք՝ Լուսավորչի, Սահակ Պարթեւի եւ Կոմիտասի:
Ս. Հռիփսիմյան եւ Ս. Գայանյան կույսերի նահատակությամբ նախապատրաստվեց
հայոց՝ առ Աստված մեծ դարձը, ի Քրիստոս համազգային մկրտությունը,
որից հետո Քրիստոսի խաչանիշ դրոշը հաղթականորեն պարզվեց հայոց աստվածաշնչյան
հողի վրա եւ իր հովանու տակ առավ այն:
ՈՒԽՏԻ ՍՈՒՐԲ ՊԱՏԱՐԱԳ
Առավոտյան Մայր Աթոռ Ս. Էջմիածնից եկեղեցականների խաչվառազարդ թափորը,
«Անձինք նվիրեալք» շարականի երգեցողությամբ, ուղղվեց Ս. Հռիփսիմե
վանք: Տոնի առիթով, հավատավոր ժողովրդի խոնարհումի եւ օրհնության
համար, դուրս էր բերվել նաեւ Մայր Աթոռում պահվող, Սրբուհու մասունքն
ամփոփող, Ս. Աջը:
Ս. Հռիփսիմե վանքի ուխտի այս օրը Սուրբ եւ անմահ Պատարագ մատուցեց
վանորեից տեսուչ Տ. Արտակ եպս. Տիգրանյանը: Սրբազան արարողակարգից
հետո, վանքի բակում, կատարվեց Անդաստանի արարողություն, որի ընթացքում
նահատակ Սրբուհու մասունքակիր Աջով կատարվեց հավատացյալների օրհնություն:
Ուշ երեկոյան ուխտավորները տուն վերադարձան՝ իրենց հետ տանելով խաչազգեստ
վկայուհիների բարեխոսությունը:
ԱԼՎԱՐԴ ԿԱՂԶՎԱՆՑՅԱՆ
>>>
|
|