ՊԱՐԳԵՎԱԲԱՇԽՈՒԹՅՈՒՆ ՄԱՅՐ ԱԹՈՌՈՒՄ
ՍՐԲՈՑ ՂԵՎՈՆԴՅԱՆՑ ՏՈՆԻ ԱՌԻԹՈՎ
ետրվարի
6-ին՝ Ս. Ղեւոնդյանց քահանաների տոնի առիթով, Մայր Աթոռ Սուրբ Էջմիածնում,
նախագահությամբ Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն
Հայոց Կաթողիկոսի, տեղի ունեցավ քահանաների շնորհաբաշխման արարողություն:
Արարողությանը
ներկա էին Հայաստանյայց Առաքելական Սուրբ Եկեղեցու հայաստանյան թեմերի
առաջնորդները, Մայր Աթոռի միաբանները եւ Մայր Աթոռի կառույցներում
ու թեմերում սպասավորող 236 եկեղեցականներ:
Միասնական Տերունական աղոթքից հետո բացման խոսքով հանդես եկավ Շիրակի
թեմի Առաջնորդ Գերաշնորհ Տ. Միքայել եպիսկոպոս Աջապահյանը: Տոնի
առիթով շնորհավորելով Նորին Սրբությանը եւ Հայ Եկեղեցու ողջ հոգեւոր
դասին` Սրբազան Հայրը նշեց, որ Սրբոց Ղեւոնդյանց տոնը քահանայական
ծառայության արժեւորման, պանծացման ու փառաբանության օր է: Միքայել
Սրբազանը նաեւ մաղթեց, որ կորովը, ներշնչանքն ու աստվածային շնորհներն
անպակաս լինեն քահանայական դասից:
Մինչ պարգեւաբաշխությունը՝ «Դավիդյան» հիմնադրամի նախագահ եւ բարերար
տիար Ասո Դավիդյանը քահանայից դասին տեղեկություններ փոխանցեց Հայոց
Եկեղեցու գործառնությունների բարելավման ծրագրի վերաբերյալ: Տիար
Ասո Դավիթյանը ներկայացրեց այս առնչությամբ կատարված աշխատանքները,
պատասխանեց հոգեւորականների հարցերին:
Այնուհետեւ
տեղի ունեցավ շնորհաբաշխությունը: Տոնի առիթով Վեհափառ Հայրապետը
մի շարք եկեղեցականների շնորհեց քահանայական լանջախաչեր: Ամենայն
Հայոց Կաթողիկոսի օրհնությամբ լանջախաչ կրելու իրավունքի արժանացան
տարբեր թեմերում ծառայող մի խումբ քահանաներ:
Հավարտ պարգեւաբաշխության Գարեգին Բ Ամենայն Հայոց Կաթողիկոսը, տոնի
առիթով, շնորհավորեց եւ իր օրհնությունը հղեց արարողության մասնակիցներին`
մաղթելով, որ Ս. Ղեւոնդյանք մշտապես ոգեշնչեն եկեղեցականներին իրենց
առաքելության մեջ:
Նորին Սրբությունը նշեց, որ Հայոց Եկեղեցին մեկ ու կես հազարամյակ
նշում է այս տոնը` կարեւորելով այն արժեքները, որոնք այն մատուցում
է մեր ժողովրդին: Վեհափառ Հայրապետը դրանց շարքում մասնավորապես
առանձնացրեց մեր Տեր Հիսուս Քրիստոսին անձնազոհ նվիրումը, որն իրենց
նահատակությամբ վկայեցին Ս. Ղեւոնդյանք:
Անդրադառնալով մեր օրերում եկեղեցականների ծառայությանը եւ հայոց
ազգի հոգեւոր կյանքին` Հայոց Հովվապետն ընդգծեց, որ, իբրեւ Տիրոջ
խոսքի քարոզիչներ, Տիրոջ այգու մշակներ ու տնտեսներ, եկեղեցականները
պետք է այնպես խնամեն Տիրոջ այգեստանները, որ դրանք ծաղկուն վիճակի
մեջ ու բարեբեր մնան, մշտարթուն ու աչալուրջ լինեն, որպեսզի չարը
որոմներ չսերմանի, եւ ժամանակին կարողանան նկատել եւ արմատախիլ անել:
Վեհափառ Հայրապետը հորդորեց հոգեւոր դասին զգոն եւ նախանձախնդիր
լինել հոգեւոր սպասավորության մեջ, ազգի զավակներին սնել, կրթել
ու դաստիարակել Քրիստոսի պատվիրաններով եւ պատգամներով, Աստվածաշնչի
խոսքով` զգուշացնելով, որ այսօր չարը գործում է տարբեր ու ավելի
բարեկիրթ անվանումների ներքո:
Գարեգին
Բ Կաթողիկոսը նշեց նաեւ, որ, աշխարհիկության անվան ներքո, ներկա
ժամանակներում անհավատություն եւ եկեղեցատյացություն է քարոզվում
եւ տարածվում, փորձ է արվում խարխլել քրիստոնեական հոգեւոր արժեհամակարգը,
այն արժեքները, որոնցով դարեր շարունակ ապրել է ու հարատեւել հայ
ժողովուրդը, փորձ է արվում շփոթեցնել եւ շեղել նրան դարերով դավանած
ճշմարիտ հավատքից ու արժեքներից:
Նորին Սուրբ Օծությունը շեշտեց, որ այսօրվա եկեղեցականության սրբազան
եւ նվիրական պարտականությունն է շարունակել հայրերի արթուն սպասավորությունը:
Այս կապակցությամբ Ամենայն Հայոց Կաթողիկոսն իր գնահատանքը հայտնեց
թեմակալ առաջնորդներին եւ քահանայից դասին ջանադիր աշխատանքի համար`
հայցելով Տիրոջ զորակցությունը եւ Սուրբ Հոգու շնորհներն ամենքին`
առավել պայծառացնելու Քրիստոսի Սուրբ Եկեղեցին եւ նրա զավակներին
համախումբ պահելու Եկեղեցու կամարների ներքո: Գարեգին Բ Վեհափառը
պատգամեց ժողովրդի հոգում միշտ սերմանել հավատի հունդերը, որպեսզի
դրանք առատ պտղաբերեն հայրենաշեն եւ եկեղեցանվեր գործերով:
Վերջում Ամենայն Հայոց Կաթողիկոսն աղոթեց, որ Աստված Իր Աջը հովանի
դարձնի հայրենի երկրին ու ժողովրդին եւ Իր օրհնությամբ ու առատ շնորհներով
զորացնի եկեղեցականներին` փառքով կատարելու իրենց ծառայությունը
հավատավոր ժողովրդի հոգեւոր կյանքի շինության համար:
ՄԱՅՐ ԱԹՈՌ Ս. ԷՋՄԻԱԾԻՆ ՏԵՂԵԿԱՏՎԱԿԱՆ ՀԱՄԱԿԱՐԳ
>>>
|
|