ՏԻՐՈՋՆ
ԸՆԴԱՌԱՋ ԳՆԱԼՈՒ ՀՐԱՎԵՐԸ ԹԻՎ 15 ԴՊՐՈՑՈՒՄ
«Ես եմ աշխարհի լույսը: Ով որ ինձ հետեւի,
խավարի մեջ չի քայլի, այլ կունենա այն լույսը, որ առաջնորդում է
դեպի կյանք»:
ՀՈՎՀ. Ը 12
արդկային
հարաբերություններն առանց քրիստոնեական առողջ դաստիարակության, ավետարանական
պատգամների ճշգրիտ իմացության եւ ըմբռնման, անկասկած կթերանան իրենց
առաքելության եւ կոչման մեջ: Ճիշտ դաստիարակություն ստացող յուրաքանչյուր
քրիստոնյա հայորդի հաղորդակից է դառնում մեր Տեր Հիսուս Քրիստոսի
կյանքին, Սուրբ Հայրերի կողմից սահմանված հոգենորոգ աղոթքներին ու
շարականներին: Առաջնորդվելով այս գաղափարով՝ արդեն տասը տարի է,
ինչ թիվ 15 կրթօջախում գործում է կիրակնօրյա դպրոց, որ կոչվում է
մեր հավատքի Հոր՝ Սուրբ Գրիգոր Լուսավորչի անունով:
Տյառնընդառաջը՝
առաքելահաստատ այս տոնը, լույսի, հույսի եւ Աստծուն ընդառաջ գնալու
հրավեր է, որը եւս մեկ անգամ մեզ հիշեցնում է Տիրոջ հետ հանդիպման,
Նրանով մեր կյանքն արժեւորելու եւ Տիրոջ անմար լույսը մեր մեջ ունենալու
անհրաժեշտությունը: Համաքրիստոնեական այս տոնին առանձնահատուկ էին
պատրաստվել դպրոցի 5-9-րդ դասարանների աշակերտները, ովքեր, կարծես,
ի մի բերեցին հավատքի լույս գործերը:
Հիրավի, այսօր առավել, քան երբեւէ Աստծո լույսի կարիքն ունենք, որպեսզի
ցրենք մեզ շրջապատող անգիտության խավարը եւ մեր կյանքը պայծառակերպենք
ու իմաստավորենք Քրիստոսով: Այս իրողության շուրջն էր յուրահատուկ
ջերմությամբ համախմբվել ուսուցչական կազմը՝ տնօրեն տիկին Սեդա Համբարձումյանի
ղեկավարությամբ եւ դաստիարակության գծով փոխտնօրեն Քնարիկ Ադամյանի
նախաձեռնությամբ: Ներկա էին դպրոցի աշակերտները եւ ծնողները:
Միջոցառումը,
որ տեղի ունեցավ կրթօջախի բակում, սկսվեց «Տերունական աղոթք»-ով
եւ բովանդակում էր Հիսուս Քրիստոսի Սուրբ Ծնունդը, քառասնօրյա Մանկան
տաճարընծայումը՝ միաձուլված հայկական ազգային սովորույթներին:
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի տնօրինությամբ Տյառնընդառաջի
տոնը հռչակվել է նաեւ նորապսակների օրհնության օր: Սցենարը զերծ
չէր նաեւ հարսանեկան տեսարանից: Դպրոցի աշակերտներից զույգեր էին
կազմվել՝ հարսանիքի տեսարանը ներկայացնելու համար: «Հարսն ու փեսան»,
«հարսանիքի» մասնակիցների հետ, շրջեցին բոցավառ կրակի շուրջը, պարեցին
ու արտասանեցին:
Այնուհետեւ աշակերտները, իրենց ձեռքով պատրաստած եւ գեղեցիկ փաթեթավորումներով
զարդարած, աղանձները բաժանեցին ներկաներին: Հոգեւոր աշխարհը կարեւոր
է մարդու համար, քանի որ այդ կերպ հավատքը գործի է վերածվում, ի
ցույց է տրվում իմացածը, սովորածը:
Տյառնընդառաջին նվիրված հանդիսույթն ամբողջությամբ առ հոգեւոր ճանապարհը
հաստատուն մի քայլ էր, որն օգնելու է յուրաքանչյուր աշակերտի՝ սեփական
կյանքը ճշմարտությամբ շեշտադրելու հարցում:
ԱԼՎԱՐԴ ԿԱՂԶՎԱՆՑՅԱՆ
ԼՈՒՍԱՆԿԱՐՆԵՐԸ՝ ՔՆԱՐԻԿ ԱԴԱՄՅԱՆԻ
>>>
|
|