ԿԱՐԻ
ԱՐՀԵՍՏԱՆՈՑԻ ՏԵՍԱՆԵԼԻ ԱՐԴՅՈՒՆՔԸ
2017
թվականի սեպտեմբերից սոցիալ-կրթական կենտրոնում մեկնարկեց կարի ուսուցման
մասնագիտական դասընթացը՝ հնարավորություն ընձեռելով գործազուրկ կանանց
եւ աղջիկներին ձեռք բերել համապատասխան հմտություններ եւ գիտելիքներ՝
հետագայում աշխատանք գտնելու կամ ինքնազբաղվածություն ապահովելու
նպատակով: Մոտ մեկ ամսվա ընթացքում դասընթացի քսան մասնակիցները
ձեռք բերեցին նախնական գիտելիքներ եւ հմտություններ, ծանոթացան տեխնիկայից
օգտվելու անվտանգության կանոններին, ապա դասընթացը շարունակվեց նորաբաց
կարի արհեստանոցում, որը ստեղծվել է ԱՄՆ Խաղաղության կորպուսի հայաստանյան
գրասենյակի, Շիրակի թեմի, «Դի-Վի-Վի Ինթերնեյշնալ Հայաստան» կազմակերպության
եւ սոցիալ-կրթական կենտրոնի ջանքերով:
Նախնական
փուլը հաջողությամբ հաղթահարեցին մասնակիցներից 13-ը, ովքեր հոկտեմբեր-դեկտեմբեր
ամիսների ընթացքում ձեռք բերեցին կարի ուսուցման ոլորտում հիմնարար
տեսական եւ գործնական գիտելիքներ՝ համագործակցելով եւ ուսումնական
պրակտիկա անցնելով Գյումրու հայտնի կարի արհեստանոցներում եւ արտադրամասերում:
Հունվարի 23-ին սոցիալ-կրթական կենտրոնում հանդիսավոր կերպով ամփոփվեց
կարի ուսուցման դասընթացը: Մասնակիցներին իր հայրական օրհնությունն
ու շնորհավորանքն էր բերել Շիրակի թեմի Առաջնորդ Տ. Միքայել եպս.
Աջապահյանը: Մեծաթիվ հյուրերի եւ գործատուների ներկայությամբ մասնակիցները
համարձակորեն ցուցադրեցին իրենց իսկ կարած հագուստները: Թե՛ մասնակիցների
համարձակությունը, թե՛ կատարված աշխատանքների նրբաճաշակ եւ ներկայանալի
լինելը մեծ ոգեւորություն ու խանդավառություն պարգեւեցին ներկաներին:
Ծրագրի շրջանավարտները ոլորտի մրցունակ մասնագետներ են դարձել եւ
ունեն նոր աշխատանք գտնելու լավագույն հնարավորություն:
ԵՍԹԵՐ ԳՐԻԳՈՐՅԱՆ
>>>
|
|