Ընթացիկ համար

Քեզ համար   

Մանուկներին

Արխիվ

Քարոզները

Բացիկներ

«ԿԱՏԱՐԻՉ ԽՆԴՐՒԱԾԱՑ, ԼՍՕՂ ԱՂՕԹԻՑ,
ԱՐԱԳԱՀԱՍ ՍՈՒՐԲԴ ՍԱՐԳԻՍ...»
ՍՈՒՐԲ ՍԱՐԳՍԻ ՏՈՆԸ ՀԱՄԱՆՈՒՆ ՄԱՏՈՒՌՈՒՄ

«Զի էր խաչ մի սքանչելագործ առ ամենայն նեղեալս, եւ մանաւանդ առ գերիս, զի որք ապաւինէին ի նա բոլորով սրտիվ, ինքն իսկ սուրբ վկայն Սարգիս բանայր զդրունս բանտից եւ արգելանաց…»:
ԿԻՐԱԿՈՍ ԳԱՆՁԱԿԵՑԻ

ուրբ Սարգիսը հայոց կողմից սիրելի եւ մեծ ժողովրդականություն վայելող սրբերից է, ծննդով Կեսարիայից: Հին Օրենքի վերջին եւ Նոր Օրենքի առաջին Սուրբ Հովհաննես Կարապետից հետո, իբրեւ նշանավոր սուրբ, ոգեկոչվում է Ս. Սարգսի տոնը:

Արագահաս զորավարն ապրել ու գործել է չորրորդ դարում, խուսափել Հուլիանոս Ուրացող կայսեր (361-363) հալածանքից, նախ ապաստանել հայոց Տիրան թագավորի մոտ, ապա վերջինիս խորհրդով անցել Պարսկաստան, կարգվել Շապուհ II-ի բանակի զորահրամատար: Նա լավ սպառազինված, արիասիրտ ու պահապան զորական է, որը միանգամայն համախոս է նրա եկեղեցական վկայաբանությանը, միաժամանակ եւ ատենահաս, այսինքն՝ ժամանակին հասնող եւ գերյալներին ազատող սուրբ:

Բայց այս ամենով հանդերձ՝ Ս. Սարգիսը մեզ համար կերպավորվում է իբրեւ քրիստոնյայի իսկական կատարելատիպ, ներշնչանքի իրական աղբյուր: Ճշմարտության վեհ գիտակցումը, իր սկզբունքներին հավատարիմ մնալը եւ դրանց հաստատագրման համար աննահանջ պայքարն ուրվագծում են նրա կյանքի ու գործի առանցքը: Ուղենիշ ունենալով Քրիստոսի խաչը՝ Սարգիսն իր մարմինը հոժարակամ դնում է Տիրոջ զոհասեղանին՝ ի փրկություն եւ ի լուսավորություն, հեթանոսական խավարի մեջ խարխափող, ժողովրդի:

ՏՈՆԻ ԺՈՂՈՎՐԴԱԿԱՆՈՒԹՅՈՒՆԸ

Սուրբ Սարգիս զորավարի տոնը ցայսօր ընդունված է նշել ոչ միայն եկեղեցական ծեսով, աղոթքով, այլեւ ժողովրդական սովորույթներով, որոնք նվիրական են հայոց ավանդության մեջ: Տոնին նախորդող ուրբաթ գիշերը նորահաս երիտասարդները՝ հատկապես աղջիկները, աղաբլիթ են ճաշակում, որպեսզի երազում, Սրբի հրամանով եւ ճակատագրի կողմից կանխորոշված, կյանքի ապագա ընկերները ջուր տան ծարավներին՝ այդ կերպ կանխագուշակելով զուգընկերներին:

Բացի այդ, նույն երեկոյան, նորահաս աղջիները շաղախված փոխինդից բրդուճ էին դնում տան կտրին: Եթե ճնճղուկը վերցնում էր այն եւ թռչում ու թառում մերձակա տների տանիքներից մեկին, ուր նորահաս երիտասարդ էր ապրում, ապա դա նախանշան էր, որ հենց այդ երիտասարդն էր դառնալու ապագա փեսացուն: Ոմանք էլ ալյուրով ափսե էին դնում եւ անհամբերությամբ սպասում Սրբի ձիու ոտնահետքին:

ՍՈՒՐԲ ՊԱՏԱՐԱԳ Ս. ՍԱՐԳԻՍ ՄԱՏՈՒՌՈՒՄ

Հունվարի 27-ին, տոնի ուրախ առիթով, Սուրբ Սարգիս մատուռում մատուցվեց Սուրբ եւ անմահ Պատարագ: Օրվա պատարագիչն էր Տ. Փավստոս քհն. Սարգսյանը: Հընթացս սրբազան արարողակարգի՝ «Հայր մեր»-ից առաջ, օրվան պատշաճող քարոզ խոսեց պատարագիչ Տեր Հայրը: Սուրբ Պատարագի ընթացքում ներկա հավատացյալները հաղորդվեցին մեր Տիրոջ Սուրբ Մարմնին եւ Արյանը:

ԵՐԻՏԱՍԱՐԴՆԵՐԻ ՕՐՀՆՈՒԹՅԱՆ ԿԱՐԳ

Արդեն մի քանի տարի է, ինչ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինությամբ Սուրբ Սարգսի տոնը հռչակել է երիտասարդների օրհնության օր: Այդ առիթով, հավարտ սրբազան արարողակարգի, Տեր Հայրն իր հայրական մաղթանքն ու օրհնությունը հղեց ներկա բոլոր երիտասարդներին, ինչպես նաեւ ուխտավորներին:

ԱԼՎԱՐԴ ԿԱՂԶՎԱՆՑՅԱՆ

>>>