| «ԳՆԱՍ
ԲԱՐՈՎ, ԱՅ ՈՒԽՏԱՎՈՐ, ԵՐԱՆԻ ՔԵԶ,
ՀԱՅ ՈՒԽՏԱՎՈՐ»
 ոկտեմբերի
14-ին ՔԴՔԿ-ի մի խումբ ուսուցիչներ, Տ. Նշան քհն. Պանֆյորովի գլխավորությամբ,
ուխտագնացության մեկնեցին Հաղարծին եւ Գոշավանք, որոնք համարվում
են Հայաստանում ուխտագնացության հիմնական սրբավայրերը:
ՀԱՂԱՐԾԻՆ ՎԱՆԱԿԱՆ ՀԱՄԱԼԻՐ
Առաջին հանգրվանը Հաղարծինն էր: Տեղ հասնելով՝ մենք ականատես եղանք,
Հայաստանի հրաշագեղ բնության անբաժանելի մասնիկը կազմող, վանական
համալիրի անմեկնելի վեհությանն ու գեղեցկությանը:
Ըստ ժաղովրդական ստուգաբանության՝ «հաղարծին» բառն «արծիվների խաղ»
արտահայտության աղավաղված ձեւն է, այսինքն՝ հաղ+արծին:
Հիրավի հայոց աշխարհի գողտրիկ անկյուններից մեկում է վեր խոյացել
վանական այս համալիրը: Վանքը հիմնանորոգվել է Արաբական Միացյալ Էմիրությունների
Գերագույն խորհրդի անդամ, Շարժայի կառավարիչ Նորին Գերազանցություն
շեյխ դոկտոր սուլթան բին Մոհամմադ ալ Քասիմիի սրտաբուխ բարերարությամբ:
Հաղարծին վանքն ավելի քան հազար տարի իր ներդրումն է բերել հայոց
հոգեւոր, ազգային մշակութային կյանքի առաջընթացին: Ուխտավորներին
վանական համալիրի պատմությանը ծանոթացրեց Տ. Նշան քհն. Պանֆյորովը:
Այն 10-13 դդ կառույց է՝ բաղկացած երեք եկեղեցիներից՝ Ս. Աստվածածին,
Ս. Գեւորգ եւ Ս. Ստեփանոս:
Ուխտագնացների մեր խումբն այստեղ աղոթք առաքեց առ Աստված, ապա սկսեց
ուսումնասիրել համալիրի եկեղեցիները, մատուռները, խաչքարերը. էլ
չեմ խոսում դեպի վանական համալիր առաջնորդող խաչքարերի ուղու մասին:
ԳՈՇԱՎԱՆՔ
Իջեւանի տարածաշրջանի Գոշ գյուղում է գտնվում Գոշավանքը, ուր այցելողի
հոգուն երկնային թովիչ խաղաղություն է իջնում: Ուխտավորներն իրենց
հավատքի մոմերը վառեցին եւ ծնրադիր աղոթեցին՝ Բարձրյալից հայցելով
իղձերի իրականացում, սեր եւ հաշտություն:
Գետիկի աջ ափին է գտնվում Ս. Հռիփսիմե մատուռը, որ կառուցել է Հաղարծին
վանքի առաջնորդ Խաչատուր Տարոնցին: Այստեղ է նաեւ ասեղնագործ խաչքարերի
վարպետ Պողոս Վարդապետի գերեզմանը: Գոշավանքը եղել է միջնադարյան
Հայաստանի, 12-13 դարերի, հոգեւոր, կրթական եւ մշակութային խոշոր
կենտրոնը: Այստեղ է ապրել եւ գործել Մխիթար Գոշը: Այդ պատճառով էլ
Վարդան աշխարհագիրը վանքն անվանել է Մխիթար Գոշի աթոռատեղի:
Գլխավոր եկեղեցին Ս. Աստվածածին գմբեթավոր հոյակերտ տաճարն է՝ 1191-1196
թթ. կառուցված, որն իր տեսքով ու դիրքով իշխում է շրջակայքի վրա:
Գավթից հարավ գտնվում է 1237 թ. Ս. Գրիգոր եկեղեցին, որը հարուստ
է քանդակներով: Այստեղ վերերկրային մի զգացում հայացքդ գամում է
խաչակիր գմբեթներին եւ հոգուդ մեջ Ս. Պատարագի լույսն է հորդանում:
Ուխտավորներս տուն վերադարձանք՝ մեզ հետ տանելով Սրբերի բարեխոսությունը:
ՔԴՔԿ-ի ուսուցիչները շնորհակալություն են հայտնում Շիրակի թեմի բարեխնամ
Առաջնորդ Տ. Միքայել եպս. Աջապահյանին եւ ՔԴՔԿ-ի պատասխանատու Տ.
Նշան քհն. Պանֆյորովին՝ նման ուխտագնացություն կազմակերպելու համար
ԱԼՎԱՐԴ ԿԱՂԶՎԱՆՑՅԱՆ
>>>
|
|
