| Տոն
առաջիկա
ՍՐԲՈՑ ԹԱՐԳՄԱՆՉԱՑ ՎԱՐԴԱՊԵՏԱՑՆ ՄԵՐՈՑ
 մեն
տարի հոկտեմբեր ամսին Հայոց Եկեղեցին մեծ շուքով տոնախմբում է Սուրբ
Թարգմանիչների հիշատակը: Հայաստան աշխարհի քրիստոնեացումից մինչեւ
5-րդ դար Հայ Եկեղեցին տակավին չէր հայացել, որովհետեւ չուներ սեփական
գիր ու գրականություն: Քրիստոնեությունն իբրեւ պետական կրոն ընդունելուց
մոտ մեկ դար էր անցել:
 Սուրբ
Մեսրոպ վարդապետը, Սահակ Պարթեւ կաթողիկոսի օրհնությամբ, ձեռնամուխ
եղավ հայոց տառերի ստեղծմանը: 1600 տարի է անցել այդ օրվանից, բայց
հայ գրերը չեն փոփոխվել ու պահպանել են իրենց նախնական տեսքը:
Ապա սկսվեց Աստվածաշունչ Մատյանի ամբողջական թարգմանությունը, որ
տեւեց շուրջ 30 տարի: Աստվածաշունչն այլեւս հայերեն էր, Աստված խոսում
էր հայերեն: Ս. Սահակ Պարթեւն ու Ս. Մեսրոպ Մաշտոցը, Եզնիկ Կողբացին
ու Հովսեփ Պաղունացին, Կորյունը, Ղեւոնդ Վանանդեցին եւ մյուսներն
իրենց հոգու ամբողջ ջերմությունը ներդրեցին, իրենց հոգին նվիրեցին
Աստվածաշնչի թարգմանության սրբազան գործին: Նրանց անկրկնելի թարգմանության
շնորհիվ Աստվածաշնչի հայերեն օրինակը բոլոր ազգերի կողմից անվանվեց
թարգմանությունների թագուհի: Եվ լուսավորվեց ողջ հայոց աշխարհը:
Հայ գրերի գյուտով եւ Աստվածաշնչի թարգմանությամբ հիմք դրվեց հայ
հոգեւոր-մշակութային նոր շարժմանը, որ մեր ազգի ոսկեդարը դարձավ:
Թարգմանիչ բառը, ներկայիս առօրյա խոսակցական իմաստով, նշանակում
է լոկ մի լեզվից մի այլ լեզվի թարգմանող անձ: Սակայն մեր հայրերը
ոչ միայն թարգմանեցին Աստվածաշունչը, այլ ապրեցին ու այն հայացրին:
Նրանք Աստծուն իջեցրին հայ մարդու հոգու մեջ: Սուրբ թարգմանիչներն
իրենց կյանքով դարձան հայ ժողովրդի թարգմանն Աստծու մոտ: Այսօր էլ
նրանք շարունակում են, իբրեւ փարոս, լուսավորել հայոց ապագան: Թարգմանչաց
տոնը հայ հոգու պանծացման տոնն է: Մեր Եկեղեցու հայրերն այսօր էլ
կարծես խոսում են մեզ հետ:
Հազար ու մի փոթորիկներ անցան, բայց ոչ մի արհավիրք չկարողացավ հայ
ժողովրդի հոգուց խլել իր սեփական մայրենի լեզուն եւ, իր արյունով
գնված, քրիստոնեական հավատքը, որ մեր պապերը կտակեցին մեզ: Մնում
է աղոթել Աստծուն եւ մաղթել, որ Թարգմանչաց ոգին եւ նրանց շնորհները
մնան հայ ազգի յուրաքանչյուր անհատի հետ:
Սուրբ Թարգմանչաց տոնը հայ ժողովրդի հարգանքի տուրքն է հայ գրին,
դպրությանն ու մշակույթին եւ դրանց երախտավորներին։
>>>
|
|
