ՑԵՐԵԿԱՅԻՆ
ԿԵՆՏՐՈՆԻ ԱՄԱՌԱՅԻՆ ԲԱԿԱՅԻՆ ՃԱՄԲԱՐԸ
գոստոսի
24-ից մեկնարկեց «Երիտասարդները հանուն քրիստոնեության» ՍՀԿ կողմից
ֆինանսավորվող «Ցերեկային կենտրոն» ծրագրի ամառային բակային ճամբարը:
12-15 տարեկան 25 երեխաներ իրենց ամառային հանգստի վերջին հինգ օրերն
անցկացրին սոցիալ-կրթական կենտրոնում` ունենալով հագեցած, հետաքրքիր
եւ բազմաբնույթ առօրյա:
Երեխաների
հանգիստն առավել ուղղորդված կազմակերպելուն եւ նրանց սոցիալ-հոգեբանական
զարգացմանը նպաստելուն էին ուղղված բոլոր ուսուցումներն ու միջոցառումները:
Ճամբարի առաջին օրը երեխաներն այցելեցին քաղաքային զբոսայգի, ուր
հնարավորություն ունեցան օգտվել տարբեր կարուսելներից, խաղալ խմբային
զանազան ակտիվ խաղեր: Բոլոր օրերին նախատեսված հոգեւոր դասերն անցկացվեցին
Տ. Փավստոս քհն. Սարգսյանի եւ ՔԴԿ երկու ուսուցչուհիների կողմից:
Տեր Հայրը երեխաների հետ զրուցեց ծնող-երեխա հարաբերությունների
մասին` զուգահեռներ անցկացնելով Աստված-մարդ հարաբերության հետ:
Հոգեւոր դասն այնքան բովանդակալից էր, իսկ Տեր Հոր մեկնաբանություններն
այնքան տեղին ու հետաքրքիր, որ սաներից ոմանք դասի ավարտին խնդրեցին
Տեր Փավստոսին պարզաբանել, թե ինչպես կարելի է ստանալ հոգեւոր կրթություն
եւ ովքեր կարող են դիմել Գեւորգյան հոգեւոր ճեմարան:
Ճամբարի
շրջանակներում յուրաքանչյուր օր երեխաներն ունեին նաեւ գրադարանային
ընթերցումների ժամ, որն ամփոփվեց «Ամեն մարդ իր աստղն ունի» խորագիրը
կրող խաղով: Գրքային մնջախաղի համար ընտրվել էին մեջբերումներ «Ալիսան
հրաշքների աշխարհում» եւ «Փոքրիկ իշխանը» հանրահայտ ստեղծագործություններից:
Երեխաներն այցելեցին նաեւ Լոֆթ ժամանցային ակումբ, ուր խաղացին սենյակային
տարբեր խաղեր, զբաղվեցին ընթերցանությամբ եւ նկարչությամբ:
Ձեռքի աշխատանքի հատվածը եւս գրավիչ էր երեխաների համար, քանի որ,
դժվարություն չներկայացնող հնարքների եւ մատչելի նյութերի օգնությամբ,
երեխաները կարողացան ստանալ թղթե գեղեցիկ կերպարներ:
Ցերեկային կենտրոնի սաներն իրենց ամառային բակային ճամբարի վերջին
օրն անցկացրին Մարմաշենի վանական համալիրում: Ուխտավորներին միացավ
Մարմաշենի հոգեւոր հովիվ Տ. Փառեն քհն. Պետրոսյանը, ով երեխաներին
ծանոթացրեց վանական համալիրի պատմությանը, ներկայացրեց ճարտարապետական
առանձնահատկությունները, վանքի տարածքում գտնվող այլ կառույցներն
ու դրանց պատմությունը: Տեր Հոր գլխավորությամբ հնչեց միասնական
աղոթք, երգվեցին շարականներ, իսկ որոշ երեխաների համար կատարվեց
Հիվանդաց կարգ:
Օրն ավարտվեց սիրո ճաշով. երեխաներն իրենց ձեռքով խորոված պատրաստեցին
եւ բոլորվեցին ագապեի սեղանի շուրջ: Այս կերպ հրաժեշտ տալով ամռանը՝
նրանք երգ ու պարով եւ ուրախ տրամադրությամբ վերադարձան Գյումրի`
դիմավորելու նոր ուսումնական տարին:
ԳՈՀԱՐ ՀՈՎԵՅԱՆ
>>>
|
|